Ռուս-ամերիկյան "հակամարտություն" Հարավ-չինական եւ Դեղին ծովերում
Ֆիլիպինների մայրաքաղաք Մանիլայում բողոքի ակցիա է անցկացվել՝ ընդդեմ Ֆիլիպինների եւ ԱՄՆ զինված ուժերի համատեղ զորավարժությունների: "Ո’չ ամերիկյան զորքերին" վերտառությամբ, ավելի քան 70 ուսանող ակտիվիստներ, կարմիր ու կապույտ ներկ լցնելով ամերիկյան դեսպանատան հիմնական դարպասների վրա, պահանջել են ամենամյա զորավարժություններին մասնակցող ամերիկյան զորքերից անհապաղ հեռանալ երկրից:
Հիշեցնենք, ամենամյա զորավարժություններին, որ այս անգամ իրականացվում են "Բալիկատան" (ուս-ուսի) ծածկանվամբ, մասնակցում են շուրջ 7000 զինվոր եւ սպա:
Զորվարժությունների սցենարը ենթադրում է, որ ոմն ագրեսոր նավթի եւ բնական գազի արդյունահանման օբյեկտներ է զավթել: Ֆիլիպինցի եւ ամերիկյան զինվորականների խնդիրն է վերահսկողության տակ
վերադարձնել այդ օբյեկտները:
Հետաքրքիր է, որ վերջին շրջանում Չինաստանի եւ Ֆիլիպինների միջեւ սրվել էին հարաբերությունները՝ կապված Հարավ-չինական ծովում գտնվող որոշ կղզիների պատկանելիության շուրջ վեճի հետ: Կղզախմբի առանձնահատկությունը կայանում է բնական պաշարների առատության մեջ: Ի դեպ, վերջիններիս տիրապետությանն է հավակնում է նաեւ Թայվանը:
Հիշեցնենք, որ համատեղ զորավարժություններից ուղիղ մեկ շաբաթ առաջ այս կղզիների շուրջ ստեղծված միջադեպի առնչությամբ Ֆիլիպինների ԱԳՆ ներկայացուցիչը հայտարարել էր, որ Մանիլան մտադիր է խնդիրը հարթել դիվանագիտական ճանապարհով:
Չինաստանի հետ լարված հարաբերությունների ֆոնին, Ֆիլիպիններն սկսել է ամրապնդել իր ռազմական հզորությունը և ձգտում է Վաշինգտոնի հետ առավել սերտ համագործակցության:
Վերլուծաբաններն այն կարծիքին են, որ իրականացվող զորավարժությունները, որոնք կավարտվեն ապրլի 27-ին, նպատակ են հետապնդում Պեկինի վրա զսպող ազդեցություն ներգործել: Ընդ որում Պեկինից Մոսկվայի հասցեին արդեն քողարկված քննադատություն եւս հնչել է այս կապակցությամբ:
Այս իմաստով հատկանշական է, որ մինչ զորավարժությունների ավարտը դրանց հարեւանությամբ՝
Դեղին ծովում, պետք է մեկնարկեն ռուս-չինական զորավարժությունները: Շատերը պնդում են, որ դրանք մինչ այս, ինչպես Ռուսաստանի, այնպես էլ Չինաստանի համար, ամենամասշտաբայինն են լինելու եւ որոնց նպատակն է երկու երկրների հարաբերությունների ամրապնդումը: Որոշ ռուս վերլուծաբաններ էլ մտավախություններ ունեն, որ Պեկինն այսպիսով կարող է որեւէ կերպ Մոսկվային ներքաշել իրեն առնչվող հակամարտության մեջ:
