Եվրախորհրդարանի արտաքին հարաբերությունների հանձնաժողովը երեկ փաստաթուղթ է ընդունել Հայաստանի վերաբերյալ: Ինչպես եւ նախատեսված էր նախագծի համար լրամշակումների հավելվածում, ի թիվս այլ դրույթների, հանձնաժողովն առաջարկել է, որպեսզի ԵԱՀԿ Մինսկի խմբում Եվրամիությունը փոխարինի Ֆրանսիային։
Փաստաթուղթը դեռեւս պետք է քվեարկության դրվի Եվրախորհրդարանի լիագումար նիստում, ինչն, ամենայն հավանականությամբ, տեղի կունենա մեկ ամսից։
Հիշեցնենք, որ Եվրախորհրդարանի արտաքին հարաբերությունների հանձնաժողովը եռօրյա նիստ էր գումարել, որի օրակարգում նաեւ Հարավային Կովկասին վերաբերող հարցեր էին։
Հարավային Կովկասի տարածաշրջանի
վերաբերյալ եվրոպացի օրենսդիրները մարտի 22-ի քվեարկությամբ հավանություն տվեցին հանձնարարական բնույթի երկու փաստաթղթերին, որոնք լիագումար նիստում վավերացվելուց հետո պետք է փոխանցվեն Եվրահանձնաժողովին` Հայաստանի հետ Ասոցացման պայմանագրի բանակցություններում կիրառվելու նպատակով։
Փաստաթղթի նախագծում նշվում էր գալիք խորհրդարանական ընտրությունները պատշաճ անցկացնելու անհրաժեշտության մասին, ինպես նաեւ անդրադարձ կար Մեծամորի ատոմակայանին, որը, ըստ Եվրամիության, մտահոգության առիթ է եւ առաջարկվել է որոշել դրա աշխատանքը դադարեցնելու հստակ ժամկետը:
Նշենք, որ լիագումար նիստում քննարկման ժամանակ զեկույցի լրամշակումը կարող է նաեւ մերժվել։
