Հուլիսի 25-ին Ճապոնական ծովում սկսվել են ԱՄՆ-ի եւ Հարավային Կորեայի զինվորականների մասնակցությամբ զինավարժանքները, որոնք կտեւեն մինչեւ հուլիսի 28-ը: Այս գործողությունները խիստ զայրացրել են Հյուսիսային Կորեային, որն արդեն հանդես է եկել բարձրագոչ հայտարարություններով:

ԱՄՆ-ի եւ Հարավային Կորեայի ներկայացուցիչները չեն թաքցնում, որ զինավարժանքներն այս տարվա մարտին հարավկորեական "Չհոնան" նավի ոչնչացման պատասխանն են: Զորավարժանքները պետք է սկսվեին դեռ հունիսի 8-ին, սակայն հետաձգվեցին մինչեւ ՄԱԿ-ի ԱԽ կողմից այդ միջադեպի մասին բանաձեւի ընդունումը: Ի վերջո, այն

ընդունվեց հուլիսի 9-ին, որտեղ խոսք չկար Հյուսիսային Կորեայի մեղավորության մասին, այնտեղ միայն ընդհանուր մեղադրանք էր բոլոր նրանց, ովքեր ոչնչացրել են նավը: Իսկ մինչ այդ փորձագետների խումբը եզրակացրել էր, որ նավը խորտակվել է հյուսիսկորեական սուզանավից արձակված հրթիռի պատճառով: Սակայն մի շարք պետություններ, առաջին հերթին Ռուսաստանը եւ Չինաստանը, չեն համաձայնվել նման կարծիքի հետ:
      Սկզբում որոշվել էր, որ զորավարժությունները կանցկացվեն Դեղին ծովում, այնտեղ, որտեղ խորտակվել էր "Չհոնան"-ը: Սակայն սա դուր չի եկել ԿԺԴՀ գլխավոր դաշնակից Չինաստանին: Նա հայտարարել է, որ նման գործողությունները կարող են առաջացնել Հյուսիսային Կորեայի ոչ ադեկվատ արձագանքը: Արդյունքում որոշվեց վարժանքները տեղափոխել Ճապոնական ծով:

Զորավարժություններին մասնակցում են ԱՄՆ-ի եւ Հարավային Կորեայի ռազմածովային ու ռազմաօդային ուժերի ստորաբաժանումները, երկու կողմից` 8000 զինծառայող, ինչպես նաեւ 20 նավ եւ սուզանավ, այդ թվում` "Ջորջ Վաշինգտոն" ավիակիրը, շուրջ 200 ինքնաթիռ եւ ուղղաթիռ, այդ թվում` հինգերորդ սերնդի նորագույն ամերիկյան F-22 կործանիչը:       Արդեն զորավարժությունների անցկացման նախօրյակին Հյուսիսային Կորեայի ներկայացուցիչները մի շարք

հայտարարություններ են արել` սպառնալով խստագույն պատասխան միջոցառումներ ձեռնարկել: Վիետնամի մայրաքաղաք Հանոյում այդ օրերին տեղի ունեցող ԱՍԵԱՆ-ի (Հարավարեւելյան Ասիայի պետությունների ընկերակցություն) համաժողովի ժամանակ Փհենյանի ներկայացուցիչը ամերիկա-կորեական վարժանքները որակել է որպես իր երկրի նկատմամբ թշնամական քաղաքականության օրինակ:
      Իսկ հուլիսի 24-ին էլ ԿԺԴՀ Պետական կոմիտեն հայտարարել է. "ԿԺԴՀ բանակը եւ ժողովուրդը ի պատասխան կսկսեն միջուկային զսպման վրա հիմնված սեփական սրբազան պատերազմը, ցանկացած անհրաժեշտ պահին` ամերիկյան իմպերիալիստներին եւ Հարավային Կորեայի խամաճիկային ուժերին հակահարված տալու համար, որոնք դիտմամբ իրավիճակը հասցնում են պատերազմի եզրին: Սա ոչ այլ ինչ է, եթե ոչ բացահայտ սադրանք, որը կոչված է խեղդել Կորեայի Ժողովրդադեմոկրատական Հանրապետությունը զենքի ուժով":
      Փհենյանը վարժանքներն անվանել է "Վաշինգտոնի եւ Սեուլի կողմից ԿԺԴՀ-ի նկատմամբ երկրորդ ռազմական սադրանք": Իսկ առաջինը արեւմտյան փորձագետների եզրակացություններն էին, որոնք "առանց ապացույցների ԿԺԴՀ-ի վրա դրեցին "Չհոնան" հարավկորեական նավի խորտակման պատասխանատվությունը":
      "ԿԺԴՀ-ն ստիպված է արագորեն ամրապնդել միջուկային զսպման սեփական միջուկային ուժերը, իսկ Կորեական թերակղզու միջուկազերծման հեռանկարն ավելի ու ավելի հեռավոր է դառնում",-ընդգծել են Փհենյանում:

Այսպիսի խոսքերից հետո Սեուլում եւ Վաշինգտոնում լուրջ անհանգստացել են: Հարավկորեական զինվորականները սկսել են ավելի մանրազնին հետեւել հյուսիսկորեական սահմանապահ զորքերի տեղափոխումներին: Առայժմ դեռ նշաններ չկան, թե ԿԺԴՀ-ն "ֆիզիկական պատասխան" է նախապատրաստում: Իրենց

հերթին ամերիկացիները հայտարարել են, թե "շահագրգռված չեն Հյուսիսային Կորեայի հետ խոսքակռվում":
      Ինչեւէ, Կորեական թերակղզում լարվածությունը պահպանվում է: ԿԺԴՀ միջուկային ծրագրի ճակատագրին նվիրված վեցակողմ բանակցությունները, որոնք դադարեցվել են անցյալ տարի Փհենյանի` բանակցություններից դուրս գալու պատճառով, նման խոսքերից եւ գործողություններից հետո դժվար թե վերսկսվեն ու արդյունք տան: