Ադրբեջանը զորքեր է մտցրել վրացական Դավիթ Գարեջի վանքը
Վրաստանի արտգործնախարարությունը հաստատել է, որ Վրաստանի եւ Ադրբեջանի սահմանին վիճարկելի տարածքում գտնվող Դավիթ Գարեջի վրացական վանական համալիրը գրավել են ադրբեջանցի սահմանապահները: Փոխարտգործնախարար Նինո Քալանթաձեն նշել է, որ վրաց-ադրբեջանական
սահմանի որոշումը դեռ ավարտված չէ, սակայն վանքի այն մասը, որտեղ ադրբեջանցի սահմանապահներն են, վիճելի տարածքներին չի պատկանում եւ դեռ խորհրդային ժամանակներից մտնում էր Ադրբեջանի տարածքի մեջ:
Ադրբեջանցիների ներկայության մասին հայտնել են վրացի հոգեւորականները, որոնց հաղորդմամբ ադրբեջանցի սահմանապահները մայիսի 6-ին վրացի ուխտագնացներին թույլ չեն տվել մտնել վանքի տարածք: Մեկ շաբաթ անց հոգեւորականների ուղեկցությամբ "Վրացական երազանք" ընդդիմադիր կոալիցիայի առաջնորդներն են փորձել մտնել վանք, սակայն նրանց էլ թույլ չեն տվել:
Նշելով, որ Դավիթ Գարեջի վանքը մեծ նշանակություն ունի վրաց ժողովրդի համար, քանի որ "հենց այստեղից է սկսվել Ազգային-ազատագրական շարժումը", վերջիններս իրենց տարակուսանքն են արտահայտել Վրաստանի իշխանությունների անգործության կապակցությամբ: Նրանց կարծիքով, սա խոսում է Վրաստանի եւ Ադրբեջանի իշխանությունների համաձայնեցված գործողությունների մասին` վկայակոչելով այն փաստը, որ վանքի տարածք իրենց թույլ չեն տալիս մտնել նաեւ վրացի սահմանապահները:
Ի դեպ, Ադրբեջանում այս վանքը համարում են ոչ թե վրացական, այլ աղվանական մշակույթի հուշարձան:
