Ֆրանսահայ համայնքն ունեցել է շատ հարուստ եւ աշխույժ մշակութային կյանք, որն իր բարերար ազդեցությունն է թողել Ֆրանսիայի մշակութային տարբեր բնագավառների զարգացման վրա:
      Փարիզը դարձել է հայ մշակույթի կենտրոններից մեկը: 1923 թ.-ին Փարիզում ստեղծվել է Ֆրանսահայ գրողների ընկերակցությունը, որի առաջին նախագահն էր Արշակ Չոպանյանը: Երկար տարիներ այստեղ են ապրել ու ստեղծագործել երգահան Կոմիտասը, գրողներ Ավետիք Իսահակյանն ու Ալեքսանդր Շիրվանզադեն, նկարիչ-քանդակագործ Երվանդ Քոչարը, գեղանկարիչ Մարտիրոս Սարյանը եւ այլոք:

      Ո՞վ չի ճանաչում աշխարհահռչակ երգիչ, երգահան Շառլ Ազնավուրին:
      Ազնավուրը շուրջ ութ հարյուր երգի հեղինակ է, այդ թվում` բազմաթիվ միջազգային հիթերի, ինչպիսիք են` "Մաման", "Բոհեմը", "Դեռ երեկ", "Ավե Մարիա" եւ այլն: Ազնավուրի երգերը կատարել են աշխարհահռչակ աստղեր Էդիտ Պիաֆը, Լայզա Մինելին, Պլաչիդո Դոմինգոն եւ այլոք:
      Անգնահատելի է Շառլ Ազնավուրի դերը Հայաստանին եւ հայ ժողովրդին ցուցաբերած օգնության գործում:

      Ոչ միայն Ֆրանսիայի, այլեւ համաշխարհային մշակույթի շտեմարանը հարստացրել են հայազգի բազում երաժիշտներ, քանդակագործներ, գրողներ ու նկարիչներ:
      Ֆրանսիական արդի կերպարվեստի խոշոր դեմքերից է Գառզուն` Գառնիկ Զուլումյանը: Գառզուն Պատվո լեգեոնի շքանշանի ասպետ էր. 1979 թվականին դարձել է Ֆրանսիայի գեղարվեստի ակադեմիայի անդամ։

      Ֆրանսիական արդի գեղանկարչության ականավոր դեմքերից է Ժանսեմը` Հովհաննես Սեմերճյանը: 34 կտավներից բաղկացած իր "Եղեռն" շարքը նկարիչը նվիրել է Հայոց ցեղասպանության թանգարանին:
      Ֆրանսիական կինոյի հայտնի գործիչներից է ռեժիսոր Անրի Վեռնոյը:
      Աշխարհում դժվար է հանդիպել հայի, որն իր կյանքում գոնե 1 անգամ տեսած չլինի "Մայրիկ" ֆիլմը: Անրի Վեռնոյը պարգեւատրվել է "Պատվո լեգեոնի ասպետ", "Պատվո լեգեոնի հրամանատար" շքանշաններով, իսկ "Մայրիկ" ֆիլմի համար արժանացել է "Սեզար" մրցանակի: