"Զեկույցը դրական եմ գնահատում, բայց պետք է միշտ աչքի առաջ ունենալ, որ սա միջանկյալ զեկույց է: Արժի վերջնականին սպասել, քանի որ փորձը ցույց է տալիս, որ ամեն դեպքում, միջանկյալի և վերջնականի միջև լինում են տարբերություններ: Հիմնականում դրանք բովանդակային կամ որակական չեն լինում, բայց գոնե դետալիզացիայի մեջ թույլ են տալիս ոչ միայն դիտարկել որպես գնահատում, այլև հետագայում դիտարկել որպես ռեկամենդացիաներ հնարավոր աշխատանքի առումով",- անդրադառնալով ԵԱՀԿ/ԺՀՄԻԳ դիտորդական առաքելության միջանկյալ զեկույցին, Panorama.am-ի հետ զրույցում ասաց "Եվրոպական ինտեգրացիա" ՀԿ նախագահ քաղաքագետ Կարեն Բեքարյանը:

      Նա կարևորեց այն հանգամաքը, որ նշված էտապի հետ կապված որևէ առարկություն, մտահոգություն, խախտման նմուշ չի տրվում:
      "Այսօրվա զեկույցում դրական է գնահատվում այն սեգմենտը, որն ինչ-որ ձևով կախվածություն ունի իշխանություն կրողից, իշխանություն իրականացնողից: Այսինքն` եթե մենք դա համեմատելու լինենք ընտրությունների օրվա գործընթացի հետ, բոլորս հավասարապես մասնակից ենք: Մենք հասկանում ենք, որ քարոզարշավի տարրը շատ հստակ ինստիտուցիոնալ կազմակրեպելու, իրականացնելու, կամքը ցուցաբերելու խնդիր ունի իր մեջ: Եվ փաստորեն, հենց այդ տարրով մենք այսօր խնդիր չունենք",- հավելեց Կ. Բեքարյանը:
      Նրա համոզմամբ` եթե մյուս տարրերում մենք խնդիր ունենք, այդտեղ արդեն միակ պատասխանատվություն կրողի խնդիր չէ, դա բոլորիս խնդիրն է` հանրությունից սկսած, անցած կուսակցություններով, մասնակցող դիտորդական առաքելություններով:
      Բանախոսը նաև ընդգծեց, որ դիտորդական առաքելությունների մի ստվար զանգված չի ծառայել իր նպատակին, այլ ավելի շատ կցված է եղել քաղաքական ինչ-որ ուժերի և դա ընդամենը ընտրատեղամասում ներկա գտնվելու ինչ-որ նոր մանդատային հնարավորություն է:
      "Եթե առաջ զեկույցներում ու հայտարարություններում հիմնականում ասվում էր` իշխանությունների, պատասխանատու հիմնական ուժերի կողմից բավարար չափով ուշադրություն չի ցուցաբերվել, հիմա այդ խնդիրը չկա: Հիմա խնդիրը դիտվում է ավելի ներքևի` մեր, հանրության դաշտում: Այստեղ անելիքն է շատ հետաքրքիր: Եվ մենք գործ ունենք այնպիսի խնդիրների հետ, որոնք մեր համար շատ խորը մտածելու տեղիք են տալիս և հանրային բավական լայն քննարկումների առարկա պետք է դառնան: Որովհետև ինչը-որ պետք է սպասվեր ինստիտուցիոնալ մարմնից, իշխանությունից, կարծես թե արված է իր ողջ ծավալով",- նշեց Բեքարյանը:
      Հարկ կա այս ամբողջ աժիոտաժից դուրս գալ, հաղթողներին շնորհավորել, պարտվողներին ասել, որ սա կյանքի վերջը չի... այսինքն` այդ կոնսոլիդացված վիճակն ապահովել, ընտրությունների էջը շրջել` բարի երթ մաղթելով նոր խորհրդարանին ու միանգամից սկսել հասկանալ ինչից` ուր: Երևի սա ամենակարևորն է,- եզրափակեց քաղաքագետը: