Շոտլանդական վիսկիի թանգարանի մարքեթինգային մենեջեր

-Կպատմե՞ք Շոտլանդական վիսկիի թանգարանի մասին:
-Արդեն 23 տարի է, ինչ Էդինբուրգում գործում է Շոտլանդական Վիսկիի թանգարան: Մենք գտնվում ենք Էդինբուրգյան դղյակի կողքին ու համարվում ենք “հինգաստղանի դիտարժան վայր”: Այստեղ կարելի է իմանալ, թե ինչպես է պատրաստվում վիսկին, դրա պատմության մասին, եւ կարելի է տեսնել շոտլանդական վիսկիի հիանալի հավաքածու, որն աշխարհում ամենամեծն է:
Այս հավաքածուն հավաքել է բրազիլացի գործարար Քլայվ Դիգիսը, ով շոտլանդական վիսկիի կրքոտ սիրահար էր: Թանգարանում ցուցադրված է վիսկիի 3384 շիշ, որ նա հավաքել է 35 տարիների ընթացքում: 2009թ.-ին` երեք տարի առաջ, հավաքածուն տեղափոխվել է վերանորոգված թանգարան: Քլայվը ապրել է Սան Պաուլոյում: Նա գործարար էր: Մի շոտլանդացի գործարար նրան մի օր 6 շիշ վիսկի նվիրեց, որոնք ցուցադրված են այստեղ: Այդ օրվանից ծնվեց Քլայվի սերը շոտլանդական վիսկիի հանդեպ, եւ նա սկսեց համալրել իր հավաքածուն:

-Այս հավաքածուին նոր տեսակներ ավելանո՞ւմ են:
-Ո՛չ, ամբողջը Քլայվի հավաքածուն է: Մենք ոչինչ չենք ավելացրել այս հավաքածուին: Դիաժիոն, որը Շոտլանդիայի խմիչքների ամենամեծ ընկերություննե-րից մեկն է, գնեց այս հավաքածուն Քլայվից: Նրա ցանկությունն էր, որ հնարավորինս շատ մարդ հնարավորություն ունենա ըմբոշխնելու այս հավաքածուն: Այդ պատճա-ռով էլ այդ հավաքածուն այստեղ տեղափոխվեց: Մենք տարեկան 250 000 այցելու ենք ունենում: Իհարկե, շատերն են հնարավորություն ունենում դիտելու այս հիանալի հավաքածուն ու նաեւ ըմբոշխնելու վիսկիի որոշ տեսակներ:

-Որո՞նք են հավաքածուի «հպարտությունները»:
-Հավաքածուի ամենահին շիշը 1897 թվականից է, երկրորդ ամենահինը՝ 1904 թվականից: Նաեւ ունենք մի շարք տարբեր պատկերներով կերամիկական շշեր ու այլ հետաքրքիր տեսակներ:

-Հավաքածուն կարելի է համտեսե՞լ:
-Ո՛չ: Մենք իհարկե ունենք վիսկիի շշեր, որոնք այցելուները կարող են համտեսել: Այցելուներին մենք տարբեր շրջանների վիսկիներ ենք առաջարկում որպես շրջայցի մի մաս, եւ նրանք ընտրում են, թե որոնք են նախընտրում համտեսել: Այցելուններն ընտրում են Սպեյսայդ (Speyside), Այլա (Islay), Լոուլենդս (Lowlands) կամ Հայլենդս (Highlands) վիսկիների տեսակների միջեւ: