Եթե հաշվի առնենք այն հանգամանքը, որ Ղարաբաղյան հակամարտության խաղաղ լուծման գործընթացը ծավալվում է ԵԱՀԿ Մինսկի խմբի շրջանակներում, ապա զարմանալի չէ ԵԱՀԿ ԽՎ-ի` խնդրին առնչվող փաստաթղթերում դրսեւորվող անկողմնապահությունն ու կոնկրետ գնահատականներ տալուց խուսափելու միտումը։

      Համոզվելու համար շարունակենք ծանոթանալ Ղարաբաղյան հակամարտությանը վերաբերող ԵԱՀԿ ԽՎ փաստաթղթերին։ Այս հարցին անդրադարձ է կատարվել Ստոկհոլմում 1996թ. ԵԱՀԿ ԽՎ-ի ամենամյա նիստի ժամանակ ընդունված "քաղաքականության եւ անվտանգության հարցեր" բանաձեւում։
      "ԵԱՀԿ ԽՎ-ն.

11. Ընդգծում է ԵԱՀԿ-ի աջակցության կարեւորությունը համաձայնության կնքմանը կամ դրա կնքմանը նպաստելուն այնպիսի հակամարտություններում, ինչպիսիք են Լեռնային Ղարաբաղը, Աբխազիան, Մոլդովայի մերձդնեստրյան հակամարտությունը, հակամարտությունը Ռուսաստանում` Չեչնիայում, ինչպես ԵԱՀԿ-ի հեղինակության, այնպես էլ հետագա արդյունավետ գործունեության նպատակով։
12. Դրական է գնահատում հրադադարի պահպանումը մոտավորապես երկու տարվա ընթացքում Լեռնային Ղարաբաղի հակամարտության տարածքում, ինչպես նաեւ բանակցությունների շարունակումը Մինսկի խմբի հովանու ներքո։
13. Ողջունում է 1996թ.-ի ապրիլի 21-ին Լյուքսեմբուրգում Ադրբեջանի եւ Հայաստանի նախագահների համատեղ հայտարարությունը եւ "Կովկասի ազգերի միջեւ համաձայնության, խաղաղության, տնտեսական եւ մշակութային համագործակցության" մասին արձանագրությունը, որը ստորագրվել է 1996թ.-ի հունիսի 3-ին, եւ որում արտահայտված է առավելագույնս արագ ամբողջական խաղաղ պայմանագրի ստորագրմանն ուղղված բանակցությունների խորացման պատասխանատվությունը։
14. Վերահաստատում է իր համաձայնությունը ՄԱԿ-ի Անվտանգության խորհրդի 1993թ.-ին ընդունած 822, 853, 874, 884 բանաձեւերին` օկուպացված տարածքներից անմիջապես, ամբողջովին եւ առանց նախապայմանների զորքերի դուրսբերման վերաբերյալ։
15. Հաշվի է առնում ԵԱՀԿ Մինսկի խմբի ակտիվ գործունեությունը` ուղղված զինված հակամարտությունը քաղաքական համաձայնության միջոցով լուծելուն։
16. Ընդգծում է բանակցությունների ձգձգված բնույթը, որը փաստացի հակասում է ԵԱՀԿ Բուդապեշտի գագաթնաժողովի որոշմանը "Լեռնային Ղարաբաղի հակամարտության վերաբերյալ ԵԱՀԿ գործունեության արդյունավետության մեծացման վերաբերյալ"։
17. Չեղյալ է հայտարարում 1995թ.-ին Օտտավայում ԵԱՀԿ ԽՎ-ի հայտարարությունը "Անմիջապես իրականացել ԵԱՀԿ որոշումը, որը պարտավորեցնում է անդամ-պետություններին խաղաղապահ առաքելություն ուղարկել Լեռնային Ղարաբաղ, որը մինչեւ 1995թ.-ի վերջը պետք է կազմված լինի նվազագույնը 2000 անդամներից""։

      Ղարաբաղյան հակամարտության վերաբերյալ ԵԱՀԿ ԽՎ-ի դիրքորոշմանն ավելի խորապես ծանոթացնելու նպատակով շուտով ձեզ կներկայացնենք նաեւ Լեռնային Ղարաբաղի վերաբերյալ զեկույցը։