Այս տարվա առաջին կիսամյակի ընթացքում ԼՂՀ-ում գրանցված հանցագործությունները անցած տարվա նույն ժամանակահատվածի համեմատ նվազել են 29,8 տոկոսով:
      ԼՂՀ գլխավոր դատախազ Արշավիր Ղարամյանի գնահատմամբ հանրապետությունում օպերատիվ իրավիճակը վերահսկելի է, ինչը, ըստ նրա, հետաքննական ու նախաքննական մարմինների դրական աշխատանքի արդյունքն է:

Պարզվում է, որ առաջին կիսամյակում գրանցված հանցագործությունների զգալի մասը` 38,8 տոկոսը, ծանր հանցագործություններ են, 20,6 տոկոսը` միջին ծանրության, 2,8 տոկոսը` առանձնապես ծանր:       Այս ամսվա կեսերին դատախազությունում հրավիրված կոլեգիայի նիստում հրապարակված արդյունքների համաձայն` մարդու դեմ ուղղված հանցագործությունների

բնագավառում գրանցվել եւ հաշվառվել է 26 հանցագործություն` նախորդ տարվա նույն ժամանակահատվածի 49-ի դիմաց: Սեփականության դեմ ուղղված հանցագործությունները 110-ն են` նախորդ տարվա նույն ժամանակահատվածի 122-ի դիմաց, տնտեսական գործունեության դեմ ուղղվածը` 10 (19-ի դիմաց), ընդհանուր բնույթի` 29 (50-ի դիմաց) եւ պետական իշխանության դեմ ուղղված հանցագործությունների բնագավառում` 24 (49-ի դիմաց):
      Այս տարվա առաջին կիսամյակում նախորդ տարվա նույն ժամանակահատվածի համեմատ հանրապետությունում նվազել են սպանության, դիտավորությամբ առողջությանը վնաս հասցնելու, խուլիգանության, թմրամիջոցների հետ կապված, սեփականության դեմ ուղղված, պետական կամ հանրային գույքի յուրացման կամ վատնման, մաքսանենգության հետ կապված հանցագործությունները:
      Որոշակի չափով աճել են սեռական անձեռնմխելիության դեմ ուղղված հանցագործությունները, պետական կամ հանրային գույքի գողության, ավտոտրանսպորտային միջոցներ փախցնելու, հարկերի, տուրքերի վճարումից խուսափելու, պաշտոնեական լիազորությունների չարաշահման եւ անցման հետ կապված հանցագործությունները:
      Դատախազության կազմակերպա-վերահսկողական, վիճակագրական, վերլուծական, իրավական ապահովման, միջազգային կապերի եւ անձնակազմի հարցերով բաժնի պետի հավաստմամբ մարդու դեմ ուղղված հանցագործությունների առանձին տեսակների նվազումը եւ աճը պայմանավորված են բազմաթիվ բնույթի գործոններով` անհատական, սոցիալական եւ իրավական:
      Մարդու դեմ ուղղված հանցագործությունների նվազմանը զուգընթաց` բարձրացել են բացահայտման ցուցանիշները: Բացահայտման ցուցանիշների բարձրացում է արձանագրվել նաեւ ընդհանուր բնույթի հանցագործությունների նվազմանը զուգընթաց, ինչպես նաեւ տնտեսական գործունեության եւ պետական իշխանության դեմ ուղղված հանցագործությունների մասով: Միայն սեփականության դեմ ուղղված հանցագործությունների մասով է նվազել բացահայտման ցուցանիշը:
      Դատախազության տվյալներով` հանցագործությունների թիվը նվազել է Ստեփանակերտ քաղաքում` 29 դեպքով, Ասկերանի շրջանում` 1-ով, Մարտակերտի շրջանում` 15-ով, Մարտունու շրջանում` 6-ով, Հադրութի շրջանում`20-ով, Շահումյանի շրջանում` 11-ով, Քաշաթաղի շրջանում` 9-ով, իսկ Շուշիի շրջանում հանցագործությունների թիվը մնացել է նույնը: