"Հելսինկյան նախաձեռնություն-92" ղարաբաղյան կոմիտեին կից գործող Խաղաղության վարպետների ակումբը 2012թ. մայիսի 12-ին Եգիպտոսի Խաղաղության վարպետների միջազգային ակումբի աջակցությամբ Ստեփանակերտի իր գրասենյակում անցկացրեց գիտաժողով` նվիրված ղարաբաղաադրբեջանական հակամարտության գոտում զինադադարի 18-ամյակին:
Գիտաժողովի թեման էր. "Զինադադարի 18-ամյակը: Խաղաղության և հաշտության ռեսուրսներ": Գիտաժողովին մասնակցում էին ավելի քան 35 մասնակից` ԼՂՀ ԱԺ պատգամավորներ, հասարակական կազմակերպությունների, մտավորականության, լրատվամիջոցների ներկայացուցիչներ, նախկին մարտիկներ: Լեռնային Ղարաբաղի Խաղաղության վարպետների ակումբի նախագահ Կարեն Օհանջանյանը, բացելով գիտաժողովը, կարևորեց զինադադարի ռեժիմի համաձայնությունը հակամարտող կողմերի միջև, ինչը թույլ տվեց հակամարտող ժողովուրդներին ոչ միայն վերականգնել ավերված տնտեսությունը և բուժել վերքերը, այլև զարգացման ուղին բռնել և վարել հակամարտության կարգավորմանն ուղղված խաղաղարար բանակցություններ:
ԼՂՀ ԱԺ արտաքին հարաբերությունների հանձնաժողովի նախագահ Վահրամ Աթանեսյանն իր ելույթում մանրամասն վերլուծեց հրադադարի ռեժիմի հաստատման համաձայնագրի դերը ԼՂՀ զարգացման և հակամարտության կարգավորման գործընթացների վրա:
ԼՂՀ Անվտանգության և արտաքին քաղաքականության հանրային խորհրդի նախագահ Մասիս Մայիլյանն իր ելույթում խոսեց խաղաղության պահպանման համար անհրաժեշտ ներքին, տարածաշրջանային և միջազգային ռեսուրսների մասին:
ԼՂՀ ԱԺ պատգամավոր Արևիկ Պետրոսյանն իր ելույթի շեշտը դրեց խաղաղության ներուժի բարձրացման
այլընտրանքային ուղղությունների վրա, նշելով, որ խաղաղության պատասխանատվությունը պատկանում է յուրաքանչյուրին: Այս կապակցությամբ Մասիս Մայիլյանը նշեց, որ խաղաղության մասին խոսելը չի նշանակում ցույց տալ սեփական թուլությունը:
Արցախի եվրոպական շարժման նախագահ Հայկ Խանումյանն իր ելույթում անդրադարձավ խաղաղության ձևավորման մեջ լրատվամիջոցների և սոցիալական մեդիայի դերին:
Գիտաժողովն անցավ ինտերակտիվ ձևաչափով: Մասնակիցներից շատերն իրենց ելույթներում նշեցին հրադադարի ռեժիմի համաձայնության պահպանման կարևորության մասին:
Գիտաժողովի մասնակիցները հանդես եկան հակամարտող կողմերի իշխանություններին ուղղված կոչով` շփման գծում մայիսի 12-ը հայտարարել ագրեսիայից և բռնությունների զերծ օր:
.jpg)
.jpg)
