Վենեսուելայի առաջնորդ Ուգո Չավեսը մեկ շաբաթվա լռությունից հետո Կուբայից, որտեղ բուժման կուրս է անցնում, զանգահարել է վենեսուեալական Venezolana de Television հեռուստաալիք:
Իր երկրի քաղաքացիներին նա խոստացել է վերադառնալ մի քանի օրից և վստահեցրել, որ "աստիճանաբար կմտնի մարտի մեջ":
"Գտնվում եմ բուժման վերջնական փուլում: Մոտ օրերս պետք է վերադառնամ, որպեսզի Աստծո օգնությամբ, աստիճանաբար զբաղեցնեմ իմ տեղը պայքարի առաջին գծում",-ասել է Չավեսը:
Նա նշել է, որ բուժմանը զուգահեռ 2013-2019 թվականների գործողությունների ծրագիր է մշակում, քանի որ վստահ է, որ կընտրվի Վենեսուելայի նախագահ:
Չավեսը չի մոռացել նաև ընդդիմությանը, որը, նրա ներկայացմամբ, նախատեսում է երկիրն ապակայունացնող ակցիաներ իրականացնել: "Մենք չպետք է մեր տեսադաշտից դուրս թողնենք ընդդիմության այդ գործողությունները, պետք է պատրաստ լինել, որպեսզի չեզոքացնել նրանց պլանները",-ընդգծել է Չավեսը:
