Եվրոպայի և Եվրասիայի հարցերով ԱՄՆ պետքարտուղարի տեղակալ Ֆիլիպ Գորդոնը Սենատի միջազգային հանձնաժողովի լսումների ժամանակ հայտարարել է, որ Միացյալ Նահանգներն առայժմ պատրաստ չեն խոսել ՆԱՏՕ-ին Վրաստանի անդամակցության ժամկետների մասին։ Միաժամանակ, Գորդոնը նշել է, որ իրենք շարունակելու են Թբիլիսիին աջակցել դաշինքին անդամակցության պահանջների իրականացման հարցում:
"ԱՄՆ-ի ռազմական օգնությունը Վրաստանին միտված է աջակցել երկրի ռազմական բարեփոխումներին, ինչպես նաև ընդլայնել նրա հնարավորություններն Աֆղանստանում գործող անվտանգության աջակցության միջազգային ուժերի կազմում (ISAF) և ապահովել ՆԱՏՕ-ի պահանջների կատարումը: Հունվարին նախագահներ Բարաք Օբաման ու Միխեիլ Սահակաշվիլին պայմանավորվել էին խորացնել այդ համագործակցությունը",-ասել է Գորդոնը:
