Սպանված միլիոնավոր հայերին հիշելը Իսրայելի էթիկական պարտականությունն է
Իսրայելի Քնեսեթի խոսնակ Ռեվին Ռիլվինն այսօր Հայոց Ցեղասպանությանը նվիրված քննարկման ընթացքում հատարարել է, որ Իսրայելը պարտավոր է հիշել մոտ հարյուր տարի առաջ թուրքերի կողմից սպանված մեկ միլիոնից ավելի հայերին:
Ինչպես տեղեկացնում է The Jerusalem post-ը, նա նաև զգուշացրել է, որ դա չպետք է վերածվի թուրքական կառավարության վրա հարձակման:
"Մենք էթիկական պարտավորությոն ունենք` հիշելու միլիոնավոր սպանված հայերին: Սակայն արգելվում է քաղաքականացնել հարցը: Դա ուղղված չէ Թուրքիայի ներկա ռեժիմի դեմ: Մենք մեր ձայները պետք է լսելի դարձնենք այն դեպքերում, երբ այլ ազգեր թիրախ են ընտրվում",- ասել է նա:
Ռիլվինը նշել է, որ նրանք, ովքեր Երկրորդ համաշխարհայինի ժամանակ Հրեական հարցով որոշում կայացրեցին, մտածում էին աշխարհը կլռի, ինչպես դա տեղի ունեցավ հայերի դեպքում: "Կնեսետը չի կարող արհամարհել այդ փաստը",- ասել է նա:
Իսրայելի խորհրդարանում տեղի ունեցած լսումների կազմակերպիչը` "Մերեց" կուսակցությունից Զեհեվա Գալ-Օնը, կոչ է արել ի վերջո ճանաչել ցեղասպանության փաստը: Նա նշել է, որ Հոլոքոստ վերապրած հրեաները պետք է ավելի զգայուն լինեն այլոց հետ տեղի ունեցած աղետների հանդեպ:
Միակ պատգամավորը, ով դեմ է արտահայտվել Իսրայելի կողմից Հայոց Ցեղասպանության ճանաչմանը, եղել է Ռոբերտ Տիբաևը, ով նշել է, որ ավելի լավ է հարցը թողնել պատմաբաններին:
