ԵԱՀԿ-ն կարծում է, որ ղարաբաղյան հակամարտության ներկայումս գոյություն ունեցող ստատուս-քվոն անընդունելի է, և կոչ է անում Ադրբեջանին և Հայաստանին հակամարտության կարգավորման փուլում զերծ մնալ ուժի կիրառումից: Այս մասին հայտարարել է ԵԱՀԿ գլխավոր քարտուղար Լամբերտո Զանյերը` Ադրբեջաի արտգործնախարար Էլմար Մամեդյարովի հետ երկկողմ հանդիպման արդյունքում տված համատեղ մամլո ասուլիսի ժամանակ:
"Ստատուս-քվոն չի կարող ընկալվել որպես խնդրի լուծման տարբերակներից մեկը",-ընդգծել է Զայները: ԵԱՀԿ գլխավոր քարտուղարն անհանգստություն է արտահայտել շփման գծում տեղի գտած իրադարձությունների առնչությամբ` ընդգծելով, որ կողմերը պետք է ջանքեր գործադրեն առաջիկայում նման միջադեպերից զերծ մնալու համար:
Զայները նաև նշել է, որ ԵԱՀԿ-ն առաջարկում է ուժեղացնել շփման գծում մոնիտորինգային գործունեությունը: "Նախագահների հանդիպման ընթացքում համաձայնություն է ձեռք բերվել կողմերի միջև վստահության մեծացմանն ուղղված միջոցների ձեռնարկման ուղղությամբ: Մենք նաև շփման գծում հրադադարի խախտման ուսումնասիրությունների մեխանիզմ ենք առաջարկում:",- ընգծել է ԵԱՀԿ գլխավոր քարտուղարը:
