Ինչո՞ւ է Սուրբ Սարգիսը համարվում սիրո բարեխոս…      Ո՞րն է սբ. Սարգսի տոնի խորհուրդը…      Ամեն տարի բազմաթիվ երիտասարդներ այս եւ նմանատիպ այլ հարցերի պատասխաններ են փորձում գտնել:      "Արմեդիա" ՏՎԳ-ն իր նյութերում բազմիցս անդրադարձել է այս թեմային: Քրիստոնեության մեջ սիրո գաղափարի, սբ. Սարգսի տոնի խորհրդի եւ այլ հարցերի վերաբերյալ իր բացատրություներն է տվել Սուրբ Սարգիս եկեղեցու սպասավոր Տեր Հակոբ քահանա Խաչատրյանը (տես` "ԱՄԵՆԱԿԱՐԵՎՈՐԸ ԱՍՏԾՈՒ ՆԿԱՏՄԱՄԲ ՀԱՎԱՏՔ ԵՎ ՎՍՏԱՀՈՒԹՅՈՒՆ ՈՒՆԵՆԱԼՆ Է"):

     Մեզ է հասել Սուրբ Սարգիս զորավարի մասին ավանդազրույցը, որը պատմում է Սարգսի անցած փառապանծ ուղու, անաղարտ սիրո պատմության, քրիստոնեական խորը հավատի եւ հանուն այդ հավատքի` մահվան ընդունման մասին (տես` "ՍՈՒՐԲ ՍԱՐԳԻՍ` ՍԻՐՈ ՀՈՎԱՆԱՎՈՐ"):
     Սուրբ Սարգիս զորավարի տոնը Հայաստանյայց Առաքելական եկեղեցում հռչակվել է որպես Երիտասարդների օրհնության օր: Այդ օրը բոլոր եկեղեցիներում սբ. պատարագներ են մատուցվում, որից հետո կատարվում է երիտասարդների օրհնության արարողակարգ: Սակայն եկեղեցական ավանդույթներին զուգընթաց պահպանվել են այս տոնի հետ կապված ժողովրդական սովորությունները: Ժողովրդական զրույցներ են մեզ հասել նաեւ այն մասին, որ երբ սիրող զույգերը դիմում են արագահաս Սրբին, ապա նրա բարեխոսությամբ հասնում են իրենց երազանքին: Սբ. Սարգիսը, համարվելով երիտասարդների հովանավոր եւ սիրո բարեխոս, ամրացնում է զույգերի միջեւ եղած ճշմարիտ սերը, օգնում նրանց` ստեղծելու ամուր ու երջանիկի ընտանիք (տես` "ՍՈՒՐԲ ՍԱՐԳՍԻ ՏՈՆԻՆ ՊԵՏՔ Է ՍԻՐԵԼԻՆԵՐԻՆ ՆՎԵՐՆԵՐ ԵՎ ՈՒՇԱԴՐՈՒԹՅՈՒՆ ՇՌԱՅԼԵԼ"):
     Սիրո աստվածներ եւ դրանց հետ կապված ավանդազրույցներ ունեն նաեւ տարբեր երկրներ: Կապված տվյալ երկրի ազգաբնակչության ավանդույթներից` սիրո տոները նշվում են տարբեր օրեր, տոնակատարման արարողությունը տարբեր դրսեւորումներ է ունենում ( "ՍԻՐԱՀԱՐՆԵՐԻ ՏՈՆՆ ԱՐԵՎԵԼՔՈՒՄ"):
     Ամեն դեպքում, որ երկրում էլ որ նշվի, տոնի հիմքում սերն է` իր անաղարտ, գեղեցկացնող ու ազնվացնող բնույթով: