Սիրիայում առևանգված քրիստոնյաների շրջանում հայեր չկան. Սփյուռքի նախարարություն

• 25.02.2015, 16:41
•  Մերձավոր Արևելք,  Աշխարհ,  Հայաստան,  Սփյուռք

«Արմեդիա» ՏՎԳ-ի հարցմանն ի պատասխան՝ ՀՀ Սփյուռքի նախարարության Մերձավոր Արևելքի վարչությունից հայտնեցին, որ Սիրիայի հյուսիս-արևելյան շրջաններում առևանգված ավելի քան 100 քրիստոնյաների շրջանում հայեր չկան: Մերձավոր Արևելքի վարչությունից նաև հայտնեցին, որ այս շրջաններում դեռևս հայեր են բնակվում:

Հիշեցնենք, որ նախօրեին Մարդու իրավունքների մոնիթորինգի սիրիական կենտրոնը հայտնեց, որ «Իսլամական պետություն» ահաբեկչական կազմակերպությունը Սիրիայի հյուսիս-արևելքում՝ Թալ Թամր քաղաքի մերձակայքում  ավելի քան 90 քրիստոնյաներ է առևանգել: Ավելի վաղ այս տարածքները վերահսկվում էին քրդերի կողմից: Նշվում է նաև, որ «Իսլամական պետությունը» քրդական ինքնապաշտպանական ուժերի հետ բախումներից հետո իր վերահսկողությունն է հաստատել Ալ-Հասակե շրջանի մի շարք բնակավայրերի վրա: Բացի այդ տեղեկություններ են տարածվել, որ այս շրջանի գյուղերում ԻՊ-ի զինյալները երկու հնագույն եկեղեցիներ են հրկիզել:

Այսօր «Սիրիայի Ասորական ազգային խորհրդի» նախագահ Բասամ Իսհակը Reuters գործակալությանը հայտնել է, որ «իրենք ճշգրիտ տեղեկություններ ունեն առնվազն 150 ասորի քրիստոնյաների առևանգման մասին»: Իսկ սիրիական տեղեկատվական SANA գործակալությունը, հղում անելով Անտիոքի և Համայն Արևելքի Պատրիարք Եփրեմ Բ-ի հայտարարությանը, տեղեկացնում է, որ Թել Թամր քաղաքում ավելի քան 20 բնակիչ է սպանվել ԻՊ-ի զինյալների կողմից: Թել Թամրի բնակչությունն ապաստան է գտել հարևան Հասակե քաղաքում:

ԱՄՆ կառավարությունը խստորեն դատապարտել է 150 ասորիների առևանգումը՝ պահանջելով նրանց անհապաղ ազատ արձակել: «ԻՊ-ի կողմից կրոնական փոքրամասնության թիրախավորումը վկայում է նրանց դաժան և անմարդկային վերաբերմունքի մասին բոլոր այն մարդկանց նկատմամբ, ովքեր համաձայն չեն իրենց նպատակների և վնասակար համոզմունքների հետ», - International Business Times-ը մեջբերում է ԱՄՆ պետքարտուղարության ներկայացուցիչ Ջեն Պսակիի հայտարարությունը: