ԼՂՀ ՊԲ-ն կորուստներ է պատճառել հակառակորդին

• 06.03.2015, 13:37
•  ԼՂՀ

Մարտի լույս 6-ի գիշերը ադրբեջանական զինուժը առաջնային գծի տարբեր հատվածներում Արցախի հայ դիրքապահների ուղղությամբ կրակել է 60 և 80 մմ ականանետերժով, Իսթիգլալ, ԱԳՍ-17, ԴՇԿ, ՌՊԿ և այլ զինատեսակներով, տեղեկացնում է Razm.info-ն:

Բացի նշված միջոցներից, հակառակորդը հյուսիսային (Շահումյանի) ուղղությամբ կիրառել է նաև ԶՈւ-23-2 զինատեսակ: Նշված կրակակետը վնասազերծելու նպատակով ՊԲ առաջապահ ուժերը դիմել են համապատասխան գործողության, որի արդյունքում շարքից հանվել է հակառակորդի առնվազն 3 զինվոր և ԶՈւ-23-2 զինատեսակը:

Նույն ժամանակահատվածում Պաշտպանության բանակի մարտակերտյան ուղղության ստորաբաժանումները կանխարգելիչ գործողություններ են իրականացրել հակամարտ զորքերի շփման գծի հյուսիսարևելյան հատվածում: Ըստ հաստատված տվյալների` ծավալված մարտերի ընթացքում ոչնչացվել է գործողության շրջան դուրս եկած ադրբեջանական հատուկ նշանակության ստորաբաժանման չորս զինծառայող:

Վերոնշյալ գործողությունների ժամանակ հայկական կողմը կորուստներ չի ունեցել:

ՊԲ առաջապահ ստորաբաժանումները շփման գծի ողջ երկարությամբ շարունակում են վստահորեն իրականացնել առաջադրված մարտական խնդիրը և հակառակորդին թելադրել իրենց կամքը: Այս մասին տեղեկացնում է Պաշտպանության բանակի մամուլի ծառայությունը:

Ավելացնենք, որ ավելի վաղ՝ այսօր առավոտյան, Ադրբեջանի ՊՆ կայքը հայտարարել էր հայկական զինուժի գործողության մասին ու հաստատել իրենց զինծառայողներից մեկի վիրավորվելու մասին տեղեկությունը: